ငိုၼ်းၵွင်ၵၢင်ပရၵၼ်သင်ၶူမ်ႊ

ပရၵၼ်သင်ၶူမ်ႊ

ပရၵၼ်သင်ၶူမ်ႊ ပဵၼ်ငိုၼ်းၵွင်ၵၢင်ဢၼ် ႁပ်ႉႁွင်းပၼ်ၽဝၵူၼ်းႁဵတ်းၵၢၼ် ဢၼ်မီးငိုၼ်းၶဝ်ႈမၢၼ်ႇမၢၼ်ႇ၊ သင်ဝႃႈၶဝ်ႈ ပရၵၼ်သင်ၶူမ်ႊၼႆ တေလႆႈသႂ်ႇငိုၼ်းသူမ်ထူပ်းၼႂ်းငိုၼ်းၵွင်ၵၢင် ပရၵၼ်သင်ၶူမ်ႊၸွမ်းၵူႈလိူၼ်။ ငိုၼ်းၼႆႉ တေၸၢင်ႈႁပ်ႉႁွင်း ၸၢႆႇပၼ်မိူဝ်ႈ ဢမ်ႇယူႇလီ၊ ၵိူတ်ႇလုၵ်ႈ၊ ပဵၼ်ၽေးၵိုင်ႉၵၢင်ႉၼႂ်းတီႈႁဵတ်းၵၢၼ်၊ ပဵၼ်တုၵ်ႉၶိတ၊ လူႉတၢႆ။ ႁူမ်ႈပႃး ပုၼ်ႈတႃႇလုၵ်ႈလၢင်းၸဝ်ႈၵဝ်ႇ၊ မိူဝ်ႈၵႄႇထဝ်ႈမႃး၊ မိူဝ်ႈဢမ်ႇမီးၵၢၼ်ၸူဝ်ႈၶၢဝ်း၊ ၽူႈၶဝ်ႈ ပရၵၼ်သင်ၶူမ်ႊၼၼ်ႉ တေလႆႈႁပ်ႉ ၵႃႈသုမ်းၶၢဝ်းယၢမ်း၊ ၵႃႈယူတ်းယႃတူဝ်ၼႂ်းႁူင်းယႃ လႄႈ ၵႃႈသၢႆႈတႅၼ်း ငိုၼ်းၵွင်ၵၢင်ၸိူဝ်းၼႆႉ။ ၸွမ်းၼင်ႇပၵ်းပိူင်မၢႆမီႈႁႅင်းၵၢၼ်မိူင်းထႆး၊ ၼၢႆးၸၢင်ႈတိုၼ်းတေလႆႈဢဝ်လုၵ်ႈၸၢင်ႈၵူၼ်းႁဵတ်းၵၢၼ် လူင်းသဵၼ်ႈမၢႆၶဝ်ႈ ပရၵၼ်သင်ၶူမ်ႊ။ သင်ဝႃႈပေႃႈလဵင်ႉၼၢႆးၸၢင်ႈ ဢမ်ႇၼၼ် ၵုမ်ႇမၼီႇ ဢမ်ႇလူင်းသဵၼ်ႈမၢႆပၼ် ၼႂ်းၶၢဝ်းတၢင်း 30 ဝၼ်း ၼပ်ႉတႄႇဢဝ်လုၵ်ႈၸၢင်ႈၶဝ်ႈမႃးႁဵတ်းၵၢၼ်၊ တေၺႃးၽၢႆႇၵဵဝ်ႇၶွင်ႈမၢပ်ႇမႂ်တၢမ်ႇၶွၵ်ႈ (ဢမ်ႇပူၼ်ႉ6လိူၼ်) ဢမ်ႇၼၼ် တၢမ်ႇငိုၼ်း (ဢမ်ႇပူၼ်ႉ20000 ဝၢတ်ႇ) ဢမ်ႇၼၼ် တင်းသွင်ဢၼ် တၢမ်ႇၶွၵ်ႈလႄႈတၢမ်ႇငိုၼ်း။

ငိုၼ်းႁူမ်ႈႁွမ်း (သူမ်ထူပ်း)

ငိုၼ်းသူမ်ထူပ်းၼႆႉ ပဵၼ်ငိုၼ်း ဢၼ်လုၵ်ႈၸၢင်ႈလႄႈၼၢႆးၸၢင်ႈ ႁူမ်ႈၵၼ်သႂ်ႇၵူႈလိူၼ် ဢိင်ၼိူဝ် 10% ငိုၼ်းလိူၼ်လုၵ်ႈၸၢင်ႈ။ ၵၢၼ်သႂ်ႇငိုၼ်းၵွင်ၵၢင်ပရၵၼ်သင်ၶူမ်ႊ 10%ၼၼ်ႉ ၼၢႆးၸၢင်ႈတေလႆႈသႂ်ႇပၼ် 5% လႄႈ လုၵ်ႈၸၢင်ႈသႂ်ႇ 5%။ တူဝ်ယၢင်ႇမၼ်း - သင်ၸၢႆးသႅင်လႆႈငိုၼ်းလိူၼ် 10000 ပၢတ်ႇ (10000 x 5%=500ဝၢတ်ႇ)၊ ၼၢႆးၸၢင်ႈၸၢႆႇ 250ဝၢတ်ႇ၊ ၸၢႆးသႅင်ၸၢႆႇ 250 ဝၢတ်ႇ တႃႇငိုၼ်းၵွင်ၵၢင်ပရၵၼ်သင်ၶူမ်ႊ။

သုၼ်ႇလႆႈႁပ်ႉၼႂ်းငိုၼ်းၵွင်ၵၢၼ် ပရၵၼ်သင်ၶူမ်ႊ

မၢႆတွင်း - လုၵ်ႈၸၢင်ႈတေလႆႈမီးဢႃယူႉ ၼႂ်းၵႄႈ 15 ပီ ထိုင် 65 ပီ။

♦ မိူဝ်ႈလုၵ်ႈၸၢင်ႈဢမ်ႇယူႇလီ

မိူဝ်ႈလုၵ်ႈၸၢင်ႈဢမ်ႇယူႇလီ ပဵၼ်ၶႆႈပဵၼ်ၼၢဝ်ၼၼ်ႉ ၵႂႃႇယူတ်းယႃလႆႈတီႈႁူင်းယႃ ဢၼ်ၸဝ်ႈၵဝ်ႇလိူၵ်ႈဝႆႉ လူၺ်ႈဢမ်ႇလူဝ်ႇလႆႈၸၢႆႇၵႃႈယူတ်ႇယႃ။ လႄႈ ယင်းတေလႆႈႁပ်ႉငိုၼ်းထႅင်ႈၵွၼ်ႈၼိုင်ႈ ၵွပ်ႈဢမ်ႇယူႇလီလႄႈ ဢမ်ႇလႆႈႁဵတ်းၵၢၼ်။ (ၵူၺ်းၵႃႈ တေလႆႈၶဝ်ႈၼႂ်းသဵၼ်ႈမၢႆ လႄႈ သူင်ႇငိုၼ်းသူမ်ထူပ်း ငိုၼ်းၵွင်ၵၢင် ပရၵၼ်သင်ၶူမ်ႊ မႃးယဝ်ႉတီႈဢႄႇသုတ်း 3 လိူၼ်၊ ၸင်ႇၸၢင်ႈၸႂ်ႉတိုဝ်းသုၼ်ႇလႆႈ ၶေႃႈၼႆႉလႆႈ လႄႈ တေလႆႈၼႄလၵ်းထၢၼ်/ၽိုၼ်လိၵ်ႈႁပ်ႉႁွင်းမေႃယႃ)။

 ♦ တွၼ်ႈတႃႇမိူဝ်ႈၵိူတ်ႇလုၵ်ႈ

မိူဝ်ႈၵိူတ်ႇလုၵ်ႈၵေႃႈ တေဢမ်ႇလႆႈသဵင်ႈၵႃႈယူတ်းယႃသေဢမ်ႇၵႃး ယင်းတေလႆႈႁပ်ႉပႃးငိုၼ်းသၢႆႈတႅၼ်း ၵွပ်ႈဢမ်ႇလႆႈႁဵတ်းၵၢၼ်ၸူဝ်ႈၶၢဝ်း။ (ၵူၺ်းၵႃႈ တေလႆႈသႂ်ႇငိုၼ်းၵွင်ၵၢင်မႃးယဝ်ႉ တီႈဢႄႇသုတ်း 5 လိူၼ် ၸင်ႇတေၸႂ်ႉတိုဝ်းသုၼ်ႇၶေႃႈၼႆႉလႆႈ)

♦ တွၼ်ႈတႃႇမိူဝ်ႈလုၵ်ႈၸၢင်ႈပဵၼ်တုၵ်ႉၶိတ

တွၼ်ႈတႃႇမိူဝ်ႈလုၵ်ႈၸၢင်ႈပဵၼ်တုၵ်ႉၶိတ (လုသုမ်းၶိူင်ႈဢၢင်ႇၵႃႇသေ ဢမ်ႇႁဵတ်းၵၢၼ်လႆႈ) ဢမ်ႇၼၼ် ဢမ်ႇႁဵတ်းၵၢၼ်လႆႈမိူၼ်ပၵ်းၵဝ်ႇပိူင်ၵဝ်ႇယဝ်ႉၼႆ လုၵ်ႈၸၢင်ႈတေလႆႈႁပ်ႉၵႃႈယူတ်းယႃ လႄႈ ငိုၼ်းသၢႆႈတႅၼ်း။ (တေလႆႈသႂ်ႇငိုၼ်းၵွင်ၵၢင်မႃးယဝ်ႉ တီႈဢႄႇသုတ်း 3 လိူၼ်)

♦ မိူဝ်ႈလူႉတၢႆ

မိူဝ်ႈလူႉတၢႆ တေလႆႈႁပ်ႉငိုၼ်း တႃႇၵႃႈႁႅၼ်းမႃႇသႃႇပၢင်သွမ်း၊ လႄႈ ငိုၼ်းသၢႆႈတႅၼ်း။ (တေလႆႈသႂ်ႇငိုၼ်းၵွင်ၵၢင်မႃးယဝ်ႉ 1 လိူၼ်)

♦ မိူဝ်ႈမီးလုၵ်ႈလၢင်း

မိူဝ်ႈမီးလုၵ်ႈလၢင်းမႃးၸိုင် လုၵ်ႈၸၢင်ႈတေလႆႈႁပ်ႉငိုၼ်ၸွႆႈထႅမ်ၵႃႈၼမ်ႉၼူမ်းလုၵ်ႈ ၼိူင်ႈလိူၼ် 1000 ဝၢတ်ႇ။  ဢမ်ႇပူၼ်ႉ3ၵေႃႉ (လႆႈထိုင်ဢႃႇယု 6ပီ)။ 

♦ မိူဝ်ႈၵႄႇထဝ်ႈ (ဢႃႇယူႉ 55 ပီ ၶိုၼ်ႈလိူဝ်)

မိူဝ်ႈဢႃႇယူႉလႆႈ 55 ပီယဝ်ႉၼၼ်ႉ တေလႆႈႁပ်ႉငိုၼ်းၵွၼ်ႈ (ပမ်းၼႅတ်ႇ)  (တေလႆႈသႂ်ႇငိုၼ်းၵွင်ၵၢင်မႃးယဝ်ႉ ဢမ်ႇတႅမ်ႇလိူဝ် 12 လိူၼ်)

♦ မိူဝ်ႈဢမ်ႇမီးၵၢၼ်ႁဵတ်း (တူၵ်းၵၢၼ်)

သင်ဝႃႈၼၢႆးၸၢင်ႈ ဢမ်ႇၼၼ် ၵုမ်ႇမၼီႇ လိုပ်ႈဢွၵ်ႇၵၢၼ် လုၵ်ႈၸၢင်ႈတေလႆႈႁပ်ႉၵႃႈသၢႆႈတႅၼ်း 50% ၶွင်ငိုၼ်းလိူၼ် ဢမ်ႇပူၼ်ႉတႃႇၶၢဝ်းတၢင်း 180 ဝၼ်း။ (တေလႆႈသႂ်ႇငိုၼ်းၵွင်ၵၢင်မႃးယဝ်ႉ တီႈဢႄႇသုတ်း 6 လိူၼ်)